DAGUPAN CITY– Dinmakel ni bilang daray indibidwal ya nansakit na leptospirosis manlapu nen linmeksab so delap diad ciudad na Dagupan.
Diad ekslusibon impituyaw na Bombo Radyo Dagupan ed kinen Dra. Ophelia Rivera City Health Officer diad abitlan ciudad, inkuwanton patuloy iran akaantabay lapud maples so idadakel na sayan kaso.
Diad datos na City Health Office, inmabot ed limamplo tan sakey ya kaso na sayan sakit so naikurit natan ya taon.
Mas atagey ed samay bilang ya apataplo tan lima nen imbeneg ya taon.
Onong nid si Rivera, say aranasan ya baleg ya delap ya makasengeg na mantutubukan ya habagat so nenengnengen dan rason na intagey na bilang na abitlan kaso.
Kabansag tonya, nanpayo so City Health Office ya iwasan ya undakat diad delap lautla no walay sugat diad sali ta say leptospirosis so naala ed say marutak ya danum ya alaukan na sirit tan tae na utot ya unloob ed laman na totoo.
Malet met so panpapanonot ed saray residente ya agga babaliwalaen iray sintomas singa say petang, panpusisaw na bao tan pansakit na bikking.
