DAGUPAN CITY– Inatey ed impamaltog na riding in tandem so chairman of the Board na Central Luzon Media Association Nueva Ecija Chapter diad Mabini St. boundary na barangay Quezon diad Cabanatuan City.
Kinabat so biktima ya si Manuel Laxamana, 51 anyos, tan residente na barangay Bitas , Cabanatuan City.
Kenad beklew tan nanduruman parte na laman to so inateyan ton tampol.
Onong ed report, nanlapud meetimg si Laxamana tan pasempet la diad abong da lugan na pickup pasado ala-11 na labi na Sabado nen man-overtake so sakey ya motorsiklo ya niluganan na saray agga kabat ya suspek tan pinaltog so biktima.
Arekober diad akagawaan na krimen so siyamiran basyo na bala ya iinapen ya nanlapud kalibre 45 ya paltog.
Kabkabat met ya negosyante so biktima.
Likod ed inpanmaliw ya membro na media so nenengnengen met so arum nin anggulo na inpanpatey ed saya.
Diad kaplesan, anggapo ni malinew ya motibo na krimen, bangbalet tuloy so imbestigasyon na pulisya piyan naantaan iray suspek tan anto so motibo.
Kaleganan tonya, anggapo ni palapag na saray kapamilya na biktima.
