DAGUPAN CITY– Manpapaabig natan diad patambalan so apatiran totoo kasumpalan ya nablos so sakey ya dueg ya pateyen komon diad barangay Bari, Mangaldan, Pangasinan.
Akagetar ya pateyen so 10 anyos ya dueg ya pankayaryan nen Ronald Soriano diad slaughter house na Mangaldan niman na palbangon bangbalet saya so nablos tan nanwala.
Binmatik so dueg ya nanresulta na inpakapileyan na sali nen Soriano.
Binuno to met so matadero ya si Jon Mark Molato.
Nanbatik batik so dueg anggad asabi to so barangay Bari tan inatake to duwaran totoon akalugan diad motorsiklo ya sikara di Diane Bautista tan John Paul Serapion.
Nen agga napatunda, pinaltog la na saray nanrespondin pupulis so dueg diad panamegley na M16 rifle.
Tampol met ya pinatey tan nilabak so abitlan dueg.
Akabatan ya grabe so inpanwala na dueg tan no agga apatunda wala niray arum ya totoon abiktima tonya.
