DAGUPAN CITY – Anggaman umpapaway ya say PNP so natetetel ed impatey nen datin La Union Congressman Eufranio Eriguel, tuloy nin sansia so gagaween ya imbestigasyon na kapulisan piyan saya so naesolba.
Diad eksklusibon impituyaw na Bombo Radyo Dagupan ed kinen PCSupt Rumulo Sapitula, Regional Director na PNP Region 1, impalapag tonya ya maksil so linawa dan naresolba so kaso kanyan nantibokel ira na special task group piyan maganon naresolba so kaso.
Kinerew to met ya agga manepeg ya tetelen si pupulis ed inkagawa ta anggan sikara so kokondinaen day agawan inpanpatey ed datin kongresista tan sikaray nanaermenan tan miaambegya ed pamilya Eriguel.
Nilinew met nen Sapitula ya kanyan in-relieve so hepe na Agoo Police Station ya si C/Ins. Alfredo Padilla Jr. tan say La Union police provincial director ya si S/Supt. Genaro Sapiera lapud impakapatey na kabkabat ya personalidad diad luyag da tan piyan nawalaan na balon liderato tan natutukan so on-going ya imbestigasyon.
