DAGUPAN CITY-Inbulgar na Pangasinan Police Provincial Office so eksakton bilang na saray analo nen May 14 Elections ya kaiba ed say narcolist.
Onong ed saray awtoridad, 163 so katibokelan ya bilang, 81 dia so re-elected tan 82 so balon na e-elect no iner apatira dia so SK Chairman.
Tatalaranan labat na PPO so “go signal” na Camp Crame parad say ilunsad ya Oplan Tokhang kontra ed saray akasali ed listaan.
Akagetar ya mansamba ed posisyon iray analo ran barangay officials diad arapen ya Hunyo 30.
Onong ed Department of Interior and Local Government (DILG), tuloy so iyurong daray opisyales no anggapo so mangisegep na kaso.
Kaleganan tonya, dinmalan diad voluntary drug test iray kinmandidato ed say apalabas ya Barangay tan SK Elections.
Anggaman aliwan basian na diskwalipikasyon so drug test, inmalma so publiko ya nepeg anggapoy koneksyon ed droga iray opisyal.
Koneksyon ed saya babantayan na DILG iray plataporma na saray balon opisyales diad kada barangay.
