DAGUPAN CITY– Anggapo ni formal memorandum so Philippine Drug Enforcement Agency (PDEA) nilirad say pangipaway na listaaan daray barangay officials ya sangkot ed iligal ya droga.
Diad eksklusibon impituyaw na Bombo Radyo Dagupan ed kinen PDEA Region 1 spokesperson Bismarck Bengwayen, impalapag ton anggapo ni pormal ya memorandum ya nanaawat da ya manlalapud national office tan inkuwanton maslak ya sangkot iran barangay officials diad Region 1 so naaresto la sa nen 2017.
Inkuwanton, malinis la dia ed rehiyon ta halos amin so nanpasilong ed ingetar ya barangay clearing operations.
No nanonotan, kinumpirma nen PDEA chief Aaron Aquino, ya wala lay “go signal” manlapud si presidente Rodrigo Duterte ya ngaranan iray barangay officials ya dawit ed isesebel ya droga tan akatarya met iran manpaliwawa tan mangidepensa no bilang mantepet so Commission on Human Rights (CHR) ed say ipaway dan listahan.
