DAGUPAN CITY– Agni nepeg ya manpakampante iray tooo diad Syria anggano mareen lay caliber liber diman.
Diad eksklusibon impituyaw na Bombo Radyo Dagupan ed kinen Bombo Correspondent Celsa Pampilona ya wala natan diad Damascus tan tubon Iloilo City, inkuwanto ya mareen la diman natan bangbalet agga ira kumpiyansan mantuloy tuloy so kareenan ta wala la so agawa nen saman ya kayari na sakey simban mareen so awalaan na pasimbalon insabog.
Onong nid si Pampilona, nen nagagawa so pansabog, wala labat irad suyok tan aalagaren dan nasumpal so pansabog. Baleg so ilalo dan makaligtas ira ta agda anta no iner so babagsakan na bomba.
Inkuwanton agay lay takot da ta manasinger lan manasinger diad Damascus so nangel dan pansasabog.
Wala met konoy laok ya samal iray bomba tan nayari ran umpatey no saya so naangob da kanyan wala labat irad loob na panayaaman da.
No nanonotan, ingangan nen US President Donald Trump so impangilunsad na military strikes kontra ed Syria bilang dusa ed kinen Syrian President Bashar al-Assad lapud papanisiaan ya ginawan chemical attack asingger diad kapitolyo na Damascus ya inateyan na 40 too.
