DAGUPAN CITY– Inatey so sakey ya Barangay Kagawad kaleganan ya asugatan so talora niran totoo arum nira kabiangan so sakey ya menor de edad sa ed banggaan na duwaran motorsiklo diad ciudad na Urdaneta, Pangasinan.
Onong ed nalan impormasyon ya nanlapud saray otoridad, agawa so insidente diad parte na Manila North Road ed Barangay Nancayasan siyudad na Urdaneta no iner say motorsiklo ya mamanihuen nen Barangay Kagawad Ernesto Gascon Jr., singkuwentay uno anyos, residente na Barangay Camanang Roadside , ciudad na Urdaneta, so binmangga diad say kaabetan ton motorsiklo ya mamanihuen nen King Orbillo, dise otso anyos, residente na Zone 3, Barangay Sto. Domingo diad siyudad na Urdaneta.
Lapud saya, akagamor met na sugat diad nanduruman parte na laman da so duwara kaiba ray backriders ya sikara di Merlito Fragata, singkuwentay singko anyos, sakey ya CVO tan residente na Barangay Camanang ciudad na Urdaneta tan si Daniel Balaba, dise siyete anyos, residente na Barangay Sto. Domingo diad ciudad na Urdaneta.
Bangbalet agla akasabin mabilay diad ospital si Barangay Kagawad Ernesto Gascon Jr., legan ya asugatan tan manpapaabig la diad ospital so kaiba ton CVO, kaiba so driver tan menor de edad ya backrider na akabanggaan dan motorsiklo.
Akabatan ed gagaween ya imbestigasyon ya inala na motorsiklo na barangay kagawad so linya na sakey nin motor kanyan agawa so insidente.
