Sakey ya masiken ya taluran agew lan nababalang, bangkay la nen arumog

DAGUPAN CITY – Wala la ed state of decomposition so sakey ya masiken nen arumog pigaran agew la kasumpalan yan akabatan ya nababalang dyad baley na Malasiqui, Pangasinan.

Namimigmig tan aapangaten la so biktiman kinabat ya si Romeo Irangan, 63 anyos, nen anengneng yan akadukol ed sakey ya bakanten dalin ed Brgy. Bacundang West ed abitlan baley.

Iinapen na saray kadalaan to ya inatake na sakit ed puso so biktima ya sampot dan akatungtong nen simba ni.

Bangbalet, agaeekalen na saray pupulis so posibleng foul play lautla ta taluran agew la so apalabas nen adiskubre sa bangkay to tan singa aglabat iya inanap na saray katrabaho to ta sakey nimet yan katiwala ed sakey ya construction site diad lugar.