DAGUPAN CITY– Kinompirma nen Department of Education (DepEd) Region 1 Sports supervisor Edilberto Abalos, ya pinondoan na P64 million so Region 1 Athletic Association (R1AA) meet 2018 ya gagaween diad ciudad na Alaminos.
Inamin nen Abalos, ya saya so sangkaplimiruan diad kasaysayan na DepEd Region 1 ya pondoan iray billeting areas ed unyan kabaleg ya kantidad.
Likod ed saya, sangkaunaan met ya pankanawnawan na ila-live streaming so abitlan sports event.
Akabatan ya saya so sangka plimiruan ya nanhost na R1AA so ciudad tan anggapo lad oras piyan makapantarya.
Dinayew met nen Abalos so lokal ya gobyerno na ciudad ta nakaokolan komon talora anggad limay bolan so preparasyon bangbalet, masebeg so LGU Alaminos ya sarag dan iyalagey anggano 55 agew labat so inpanprepara da.
Kaleganan tonya, impalapag nen Abalos ya diad ciudad na Dagupan gaween so swimming competition ta agda la nisambot so panggawa da na swimming pool.
