Nagtala ng panibagong career milestone ang Filipina tennis star na si Alex Eala matapos makapasok sa Top 15 ng Women’s Tennis Association (WTA) singles rankings sa unang pagkakataon sa kaniyang karera.
Umakyat ng dalawang puwesto si Eala sa pinakahuling WTA rankings na inilabas nitong Lunes, Nobyembre 9, na nagtakda ng panibagong career-high ranking para sa 20-anyos na atleta.
Nagsilbi itong positibong pagtatapos sa kabila ng kabiguan niyang makuha ang kampeonato matapos matalo kay American tennis player Claire Liu sa finals ng Hong Kong Open nitong Linggo.
Kabilang sa mga naging tagumpay ni Eala ngayong 2026 ang pagkopo sa dalawang titulo sa Birmingham Open noong Hunyo at DC Open sa Washington noong Agosto. Nagtala rin siya ng walong quarterfinal appearances sa iba’t ibang torneo.
Nakamit din ng Filipina tennis star ang pinakamalalim niyang kampanya sa Grand Slam tournaments matapos umabot sa Round of 16 ng Wimbledon at third round ng US Open.
Sa kabuuan, sumabak siya sa 73 singles matches ngayong season, kung saan 47 ang kaniyang naipanalo, at unang pagkakataon ding nakapaglaro sa lahat ng apat na Grand Slam tournaments sa loob ng isang taon.
Bago muling sumabak sa mga torneo ng WTA sa susunod na taon, makakaharap ni Eala ang Indonesian tennis player na si Janice Tjen sa isang homecoming exhibition match sa Disyembre 8 sa Philippine Arena sa Bulacan.
