DAGUPAN CITY – Kason Malicious Mischief tan inpansumlang ed RA 9165 so aarapen na duwaran balolaki makasengeg ed say inpantupak na bus tan narelan ira na pinamagan bulong na marijuana diad baley na Mangatarem, luyag na Pangasinan.
Kinabat iray suspek ya sikara di June Maregmen, 23 anyos tan Kennedy Salcedo, 21 anyos, tan parehon manaayam diad Brgy. Managos ed baley na Bayambang.
Onong ed say impormasyon , kaleganan ta mangagawa na checkpoint so pupulis diad Romulo Highway ed Brgy. Andangin tan Brgy. Malabobo so nanresponde irad Brgy. Andangin kaiba so testigo ya si Joshua Fontanilla, 25 anyos, sakeya ya konduktor na bus kasumpalan ya tupaken so luluganan da. Narel met diad impanresponde na pupulis so duwaran suspek.
Nalad saranya so duwaran plastic sachet na saray pinamagan marijuana, say inusar dad motorsiklo tan aray cellphone.
Diad kaplesan so itatarya la so kason isegep kontrad saray suspek .
