Managlako na paputok diad ciudad na Dagupan, pinasakbayan na saray otoridad

Dagupan City– Pinasakbayan na saray otoridad iray manlalako na paputok diad ciudad na Dagupan piyan naiwasan so antokaman na disgrasya.

Diad impituyaw na Bombo Radyo Dagupan ed kinen Senior Supt. Franklin Ortiz, hepe na PNP Dagupan pinasakbayan tonya iray managlako tan mansasaliw ya manalwar ed panusar na paputok.

Inkuwanto ya anggad nayari so alwaran la so panusar ed saya makalanor ta aliwa labat lan delikado tan makapoy ed laman no ingen nayarin panlapuan na pool.

Kabansag tonya, nanpanonot met ed saray manpaplano tan manlabay ya manlako na paputok ya nakaoolan day mangala na permit.

Kumpiyansa met so opisyal ya epektibo so gagaween dan kampanya kontrad paputok.