DAGUPAN CITY– Tinawag ya desperadong kurang nen National Security adviser Hermogenes Esperon Jr. so nala dan report ya man-oopresi na 100,000 iray atilak ya membro na ISIS diad Mindanao pian makapanrecruit na balon kakaiba da.
Diad eksklusibon impituyaw na Bomboradyo Dagupan ed kinen Esperon, imbaga tonya ya walay nanaawat dan consistent report nilirad saya kanyan baleg so posibilidad ya walay katuwaan na abitlan balita.
Desperado la konoy atilak ya miyembro na ISIS lapud say melag dan bilang kanyan pipilitin day arum ya taga Mindanao ya unsanib diad sikara kasalat na baleg ya kuwarta.
Bangbalet manisia si Esperon ya dakel so agga unaaboloy ta delikado so isali ed abitlan grupo.
Posible kuwanton nanlapud tinakew ya kuwarta na Maute ISIS diad Marawi City so uusaren dan pondo piyan makapanrecruit na saray balo dan kakaiba.
No nanonotan, mismon si Task Force Bangon Marawi chairman Eduardo Del Rosario so angibagan makakaawat ira na report nilirad sayan nagagawa ya aliwa labat lan diad Marawi City no ingen anggad diad saray arum ya baley so gagaween ya massive recruitment na teroristang grupo.
