DAGUPAN CITY– Inatey la nen nalmuan so sakey ya kwarentay singko anyos ya Advertising Representative diad loob na sakey ya hotel diad parte na AB Fernandez ciudad na Dagupan.
Kinabat so biktima ya si Oliver Chua residente na Blue Beach subdivision Bonuan Gueset diad abitlan siyudad.
Diad inisyal ya imbestigasyon na saray otoridad, tinmawag so ina na biktima ed mismon hotel tan kinmerew na pabor diad saray akaduty ya personnels pyan nengnengen so sitwasyon na anak to diad tinuluyan ton kwarto.
Tampol ya linmad kwarto na biktima iray housekeeper ya sikara di Ryan Dela Cruz tan Raymund Reyes ya parehon mantra-trabaho ed abitlan hotel.
Sa nen lukasan da so kuwarto na biktima so anengneng dan akadukol la diad datal tan anggapoy malay.
Kanyan kinmerew iray tulong pian awiten so biktima diad hospital balet indeklaran dead on arrival nen saya so naawit diad patambalan.
Diad ginawa met ya imbestigasyon , agga anengnengan na antokaman na bakas ya pinairap so biktima.
Arekober diad loob na kwarto so duwaran bote na energy drink say sakey so anggapoy karga, sakey ya lata ng sausage, sakey ya paper bag ya nankargay pandesal tan sakey bote ng slimming juice.
Onong ed say ina na biktima ya kinabat ya si Leonila Chua, say anak tonya so walay sakit tod puso no iner walay iinumen to iyan tambal para maintenance to.
Papanisiaaan ya nayarin say nalmon panangan diad kuwarto to so posiblen sengegan na insigi sakit to ya sengeg metla na inateyan to.
