DAGUPAN CITY– Manisia so grupon Bayan Pangasinan ya say masakbay ya impangipaway na listahan na partial senatorial lineup na PDP Laban so sakey ya kurang piyan napansansia na kaplesan ya administrasyon so pakapanyari da.
Saya so imbaga nen Eco Dangla, spokesperson na grupong Bayan Muna ed nagmaliw ya impituyaw na Bombo Radyo Dagupan.
Onong ed si Dangla, say inpan-anunsyo nen House Speaker Pantaleon Alvarez ya kabiangan ira di Presidential Spokesperson Harry Roque tan Communications Assistant Secretary Mocha Uson ed say i-endorso na PDP Laban diad 2019 midterm senatorial elections so sakey labat ya indikasyon tapian natoor so labay na Duterte Administration ya naituloy so programa to kontrad sa ilegal ya droga.
Inyarum tonin malinew so panlabay na presidente anggan anggapo la iya diad pwesto so walay pakayari to nin kontrolen so ikukurang ton programa aliwa labat lad isyu na ilegal ya droga no ag say isyu na human rights violation tan extra judicial killings diad bansa.
Likod ed kinen Roque tan Uson, pasok met diad senatorial slate na partido nen Duterte ira di Davao City Rep. Karlo Nograles, Negros Occidental Rep. Albee Benitez, Bataan Rep. Geraldine Roman tan dating MMDA chairman Francis Tolentino.
No nanonotan, akauna lan in-anunsyo na PDP-Laban ya kandidato dad pagka-senador ira di Senate President Aquilino Pimentel III tan House Majority Leader Rodolfo Fariñas.
