DAGUPAN CITY– Inayunan nen Lingayen Dagupan Archbishop Emeritus Oscar Cruz so alegasyon nen House Speaker Pantaleon Alvarez ya dakel ya pari so sangkot diad nanduruman ‘kontrobersiya’ tan no maminsan sangkot ni ed ‘pedophilia.’
Diad eksklusibong impituyaw na Bombo Radyo Dagupan ed kinen Cruz, duga kono si Alvarez ta sakey iya ed say trabaho to tan aliwa lan sekreto ta wala met lad saray palapagan.
Inkuwanton wala lay Hudas nen saman nin inpaalagey so Simbahan.
Onong ed kinen Cruz, anta to iya lapud sakey ed saray trabaho tonya so linisen na sandaraiset no aliwan kagagawa tan ipapawit diad sikato so kaso piyan asikasuen tonya.
Inyalimbawa tonya so kaso na sakey ya pari diad Antipolo ya sangkot diad pedopilya tan sayan kaso so akasabi la diad Roma.
Inkuwanto ya benben na Roma so magmaliw ya disisyon ed abitlan kaso tan alagaren da labat la.
No nanonotan, binagaan nen House Speaker Pantaleon Alvarez so Catholic Bishops Conference of the Philippines o CBCP ya nepeg ya itday imano na saray pari tan Obispo iray problema diad grupo da antes ya imanuen so kakulangan na gobyerno.
