DAGUPAN CITY– Duwara so inatey, sakey so kritikal diad nan-siyan ya kaso na impaka-kuryente diad luyag na Pangasinan.
Inatey so 32 anyos ya helper kasumpalan ya akuryente diad barangay Kamanggaan ed baley na Binalonan. Kinabat so biktima ya si Zyruz Magtaos, residente na barangay San Jose , Antipolo City.
Onong diad imbestigasyon na pulisya, akalugan so biktima diad tapew na truck nen aksidente ton abenbenan so naukisan ya wire na kuryente. Tampol iyan inawit diad ospital baley inatey lam lamang so biktima. Anggapo met so nanenengneng ya foul play na saray otoridad.
Kaleganan tonya, inatey met so sakey ya dumaralos legan ya kritikal so anak tonya kasumapalan dan akuryente diad baley na Pozorrubio.
Nanlapu rad lamay, pasempet la diad abong danya so sanaman sikara di Apolinario tan Alex Awanan nen agawa so aksidente.
Akurinyas so anak to tan akabenben diad street light, tinulongan iya na ama to bangbalet pareho ran duwan akuryente.
Tinulongan ira na saray kanayon dan imbatik diad patambalan bangbalet dead on arrival si Apolinario.
Agawa so insidente kayari na say makmasil ya uran.
