DAGUPAN CITY – Sugatan so pituran totoo ya pikabiangan na 3 anyos tan sakey bolan ya ogaw kaiba so atateng tonya diad banggaan na duwaran motorsiklo diad baley na Labrador, Pangasinan.
Kinabat iray biktima ya sikara di Manuel Marayag 41 anyos, misis tonyan si Ginalyn 31 anyos tan anak dan sikara di Ethen Dominic, 3 anyos tan Sofia Jenine, 1 bolan labat la tan manaayam diad Brgy Paitan East, Sual kaleganan ya say kabanggaan da so akabatan ya si Jayson Olarte, 30 anyos kaiba so backrider toyan si Rommel Olarte tan Lailanie Betonio ya manaayam diad Caoayan, Sual.
Onong diad impormasyon unbabiyahe iray biktima diad karukuyan na Uyong, Labrador nen akabanggan so luluganan dan motorsiklo.
Lapud saya, binmantak iray biktima diad kalsada tan akagamor ira na sugat diad nanduruman parte laman da.
Tampol met iran nibatik diad patambalan tan sikara natan so manpapa-abig la.
