DAGUPAN CITY- Inatey kasumapan ya inambush so sakey ya datin membro na San Nicolas PNP diad barangay Minien, Santa Barbara, Pangasinan.
Onong ed kinen Police senior inspector Jesie Galvez, deputy chief of police na Sta. Barbara PNP, kinabat so biktima ya si PO2 Benson Mamerto, datin aktibon member na San Nicolas PNP tan residente diad baley na Asingan .
Diad say initial ya impormasyon, tinambangan bandad alas-2 na ngarem karuman so pick-up ya mamanihuen na biktima.
Onong met la ed saray akaimaton, akalugan so biktima kaiba so sakey ya agni kabat ya bii tan undadalan ira diad karukuyan na kalsada diad barangay Minien nen tomboken ira na taloran luluganan.
Nen tinmunda so luluganan na say biktima so inmepas met so animeran lalaki ya lugan na saray untutumbok diad sikaton luluganan tan asingger ya pinapaltog ya.
Arekober diad akagawaan na insidente so masolok ya 30 basyo na bala na atatagey ya klase na paltog.
Tampol met ya inawit diad patambalan iray biktima balet inatey so abitlan datin pulis kaleganan ya maong la so kipapasen na kaiba tonyang bii.
Diad sayan, kaplesan, anggapo ni lead na saray otoridad ed say pikakabat ed saray suspek tan say motibo na inpamaltog.
