DAGUPAN CITY – Agni inmarap ed saray kanayon na saray inatey tan asugatan ya biktima so makan gawa na pampasadan mini bus ya naplag diad kelas diad sitio Nursery, Barangay Capintalan, Caranglan, Nueva Ecija.
Onong diad impormasyon ya naipasabid Bombo Radyo Dagupan nen PSI Robert De Guzman, hepe na Caranglan PNP, anggad sarayan bekta agni linmad Caranglan, Nueva Ecija si Leonardo Patulot, makangawa na Leomarick Bus, tapian naalaan komon na istorya tonya tan nakatongtong na saray kanayon daray inaatey tan asugatan ed naplag ya bus.
Onong ed say Caranglan Chief of Police, karuman say pangamaen nen Patulot so linmad Caranglan Police Station ya ibabagan representative to. Wala met iray kakanayon na saray biktima so linmad kuwerpoy pulisya balet agda met akatongtong so representative na makangaway bus ta aasikasuen da met so lamay na inatey dan kapamilya.
Kaleganan tonya, aga met natawagan so numero nen Patulot.
No nanonotan, nen kabuwasan na Martes naplag ed kelas diad sitio nursery, barangay capintalan, Caranglan, Nueva Ecija so Leomarick Bus ya pankayaryan nen Patulot tan ipapasada na driver ya si Rolando Mangawang ya kaiba ed saray inatey.
Say abitlan trahedya so inateyan na masolok talumplon totoo tan pigara so asugatan.
