Drug personality inatey nen linmaban kuno ed saray pulis

DAGUPAN CITY— Inatey kasumpalan ya linmaban kuno ed saray pulis so sakey drug personality diad ginawa dan drug buy bust operation ed baley ya San Fabian, Pangasinan.

Kinabat so suspek na si Ernesto Velasco, 39, residente na barangay Bolo, San Jacinto ya manaayam balet ed barangay Nibaliw.

Oneng ed saray pulis, atunugan na suspek ya pulis so katransaksyon ton nia ed iligal ya droga kanian tinmakas osar so motorsiklo to balet naandian iya na kontrol ed say luganan to kanian nabetan na saray pulis.

Imbes kuno ya onsuko et pinaputukan to so saray pulis kanian apilitan ya pinaputukan iya na saray pulis kanian akena ed laman to rason ya inpatey ton nia.

Akabatan met ya dawit ed nanduruman iligal ya aktibidad so apatay ya suspek.