Masiken nalmon inatey ed loob na abong to

DAGUPAN CITY—Inatey la nen anengneng da so sakey masiken diad loob na abong ton nia ed barangay Sapang ed baley ya Manaoag, Pangasinan.

Kinabat so biktima na si Danny Carino, 61-anyos.

Diad imbestigasyon na saray pulis, asukayan ed kinen Cresencia Carino so agawa ed agi to nen bisitaen to iya ed abong da.

Diad palapag na saray kakaabay na biktima lanang met ya akainom so masiken na bukor to la so manaayam ed abong ton nia.

Posiblen inatake kuno iya na sakit ton hypertension balet iimbestigaan ni iya na saray pulis.

Akabatan ya kaiba so biktima ed saray sinmuko na drug personality ed barangay da pigay bulan la so apalabas.