DAGUPAN CITY—Angipalabas la ya memorandum so Police Regional Office I ed Pangasinan Police Provincial Office pian imbestigaan so saray pulis ya dawit ed saray iligal ya aktibidad diad probinsya.
Oneng ed kinen Police Superintendent Jackie Candelario, Deputy Provincial Director for Operations na Pangasinan PNP, ingangan la ira na say Regional Office da ya antaen no siopa iray pulis da ya akagawa na iligal singa say kotong tan protektor ya iligal na droga.
Kasabay ton nia akipituyaw la ira ed National Police Commission (Napolcom) pian antaen so saray pulis na sinegepan la na kaso balet akapawil ed pwesto.
Malet kuno natan so internal cleansing ed saray pulis kasumpalan na say gangan nen PNP Chief Director General Ronald “Bato” Dela Rosa.
Akabatan ya nanbuo met na counter intelligence task force so PNP pian naimbestigaan so saray kaiba dan dawit ed droga.
