DAGUPAN CITY—Inatey ed inpamaltog so sakey bii ya ibabaga dan shabu tan bugaw queen ed Barangay Buenlag, Calasiao diad luyag na Pangasinan.
Akasinger ni so lima ton nia tan walay kena ya bala na paltog so laman to say biktiman si Rescila Orienza, 41, tubon Arayat Pampanga ya man uupaan ed abitlan lugar nen anengneng iya na saray pulis.
Akaleksab met so karson ton nia nen anengneng da.
Anengneng met ed abay na say bangkay ton nia so karatulan akasulat ya na sakey iyan shabu tan bugaw queen.
Taloran basyo na bala manlalapod kalibre 45 ya paltog tan limaran tinga na agga na antan kalibre na armas so arekober ya pulisya ed akagawaan na krimen.
Mansansia met ni so imbestigasyon da mangbalet agda eekalen na rason so iligal na droga tan prostitusyon ed say motibon inpamatey ed say biktima.
