Inrekomenda na sakey ya senador ya ekalen la so Pantawid Pamilyang Pilipino Program o 4Ps tan say trabaho la so iter ed sikara na gobyerno.
Onong ed kinen Social Justice and Welfare Chairman Erwin Tulfo, sayan rekomendasyon et piyan naerep la so antokaman ya panag anamot ya gagaween na arum diad programa.
Impalapag na senador ya nen sikatoni so Department of Social Welfare and Development (DSWD) Secretary inbaga ed sikato na pigaran myembro na 4Ps ya mas labay da nin naitdan ira na trabaho nen say bulanan ya ayuda.
Impaliwawa na opisyal ya no naitdan ira na puunan piyan makapangiletneg na melag ya pakanan o sari-sari store so nawalaan ni pakatulong da ed ekonomiya na bansa.
Onong ed senador, aliwan patas ed saray low wage earner kapara na saray security guards, janitor, o kaibad abong ya agga undugay sweldo balet agmet kaiban makakaawat na ayuda na 4Ps ta aliwa ran qualified.
