DAGUPAN CITY– Maswerten akaligtas so 40 pasahero diad inpakapoolan na sakey ya pampasaheron bus legan ya unbabiyahe diad karukuyan na North Luzon Expressway.
Onong ed saray otoridad, asingger la diad Bocaue Toll Plaza so bus nen ginmapon napoolan so bokel ya walad benegan tan agga binmayag tinmayak so apoy diad arum ya parte na luluganan.
Tampol met ya linmeksab iray pasahero na napopoolan ya bus.
Alikna na saray pigaran pasahero ya walay deral na luluganan legan ya wala ni rad Dau, Pampanga bangbalet imbaga na driver ya si Rodrigo Manlapaz ya aliwan baleg so deral na luluganan tan tantanan to so manpabatik.
Nen naimano so pool, ingilig na driver so bus tan ginetman erepen so apoy diad panamegley na fire extinguisher balet agga iya akasustini.
Anggaman anggapoy asugatan diad abitlan insidente, dismayado iray pasahero ta agda la nala iray bagahe da ya walad loob na luluganan.
