DAGUPAN CITY- Isang lalaki ang naaresto ng mga operatiba ng pulisya sa isinagawang buy-bust operation laban sa ilegal na droga madaling araw ng Enero 6, 2026 sa Barangay Buenlag, Binmaley, Pangasinan.
Madaling araw nang magsagawa ng operasyon ang himpilan ng pulisya sa pakikipag-ugnayan sa Philippine Drug Enforcement Agency–Regional Office 1 (PDEA-RO1). Ang operasyon ay nagresulta sa pagkakaaresto sa isang lalaking may 31 taong gulang.
Naaresto ang suspek matapos mahulihan sa aktong pagbebenta ng hinihinalang shabu sa isang poseur buyer.
Nasamsam mula sa kanyang pag-iingat at kontrol ang limang piraso ng heat-sealed transparent plastic sachet na naglalaman ng puting mala-kristal na substansiya na hinihinalang shabu, na may kabuuang tinatayang bigat na 5.7 gramo at standard drug price value na ₱38,760.00.
Kasalukuyang inihahanda ng istasyon ng pulisya ang kaukulang kaso laban sa suspek sa paglabag sa Republic Act 9165 o ang Comprehensive Dangerous Drugs Act of 2002.
Patuloy namang pinaiigting ng mga awtoridad ang kampanya laban sa ilegal na droga sa lalawigan ng Pangasinan.
