DAGUPAN CITY– Inatey so sakey ya 3 weeks old ya ogaw ya bii kasumpalan ya apoolan so sakey ya apartment diad barangay Poblacion, Pozorrubio, Pangasinan.
Diad esklusibon impituyaw na bombo radyo Dagupan ed kinen police senior inspector Jervel Rellorta, deputy chief of police na Pozorrubio PNP, kinabat so inatey ya ogaw ya si Andrea Quiana, 3 weeks old tan manaayam diad abitlan lugar.
Anengneng labat la so apoolan ya bangkay diad sakey ya kuwarto ya angitilakan na ina to.
Ginmapo so pool ala-10:30 niman na kabuasan tan indeklaran fireout ala-11:40 niman met na kabuasan.
Say abitlan apartment so walay limaran kuwarto tan asingger diad tindaan na baley na Pozorrubio.
Apoolan so interon apartment tan anggapoy niligtas ya gamit diad loob.
Onong nid saray nanresponden pulis, duwara nin ogogaw so nailigtas manlapud apartment.
Diad kaplesan tuloy so gagawen ya imbestigasyon na saray otoridad piyan naantaan so sengegan na pool.
