DAGUPAN CITY– Inatey so sakey public school teacher legan ya asugatan so kaiba to kasumpalan ya naaksidente diad Mabini, Pangasinan.
Kinabat so inatey ya maestro ya si Gusque Noel Nebrida, 40 anyos, walay asawa tan residente na Barangay Quinaoayanan, diad baley na Bani, kaleganan ya say asugatan so kinabat ya si Chisan Marquez, trentay dos anyos, residente na Barangay Inerangan diad ciudad na Alaminos.
Diad imbestigasyon na saray otoridad, agaway insidente diad parte na National Highway na Barangay Caranglaan diad baley na Mabini, no iner nanovertake so motorsiklo ya mamanihuen nen Marquez, bangbalet agtonya naimano so unsasabin luluganan ya mamanihuen nen Eduardo Manayao, 70 anyos, retired government employee tan residente na Barangay Poblacion diad baley na Burgos.
Say resulta, nanbanggaan so duwaran luluganan ya sengegan na inpakagamor na sugat diad nanduruman parte na laman da so driver tan backrider na motor.
Imbatik nirad ospital bangbalet indeklaran dead on arrival so maestro ya si Nebrida, legan ya wala nid ospital so kaiba ton si Marquez.
Kaleganan tonya, agmet la inmabot diad ospital so sakey ya public School teacher kasumpalan ya naaksidente diad karukuyan na Brgy. Baritao diad baley na Manaoag, Pangasinan.
Kinabat so biktima ya si Alfredo Tempra, 47 anyos tan residente diad abitlana baley.
Diad imbistigasyon umpapaway ya legan ya akalugan so biktima diad tricycle so naandi kontrol diad manubela ya sengegan na impaka-aksidente to.
Imbatik diad patambalan so biktima bangbalet inatey lam lamang.
