Nagbabala ang Department of Health–Center for Health Development Region 1 (DOH-CHD 1) laban sa mabilis na pagkasira ng pagkain sa panahon ng matinding init na maaaring magdulot ng food poisoning o pagkalason sa pagkain.
Ayon kay Dr. Rhuel Bobis, Medical Officer ng DOH-CHD Region 1, hindi sapat ang amoy at itsura ng pagkain upang matiyak na ligtas pa itong kainin dahil may mga mapaminsalang bacteria na hindi nakikita o naaamoy.
Dahil dito, pinapayuhan ang publiko na panatilihin ang kalinisan sa paghahanda at pag-iimbak ng pagkain. Mahalaga ring ilagay sa refrigerator ang mga pagkaing madaling masira at iwasang iwan ang mga ito sa basa o mainit na lugar upang maiwasan ang pagdami ng bacteria.
Partikular ding pinaalalahanan ang mga bibisita sa mga sementeryo ngayong Undas na tiyaking malinis ang mga lalagyan at kagamitan sa pagluluto at pagdadala ng pagkain upang maiwasan ang kontaminasyon.
Binigyang-diin na mahalaga ang wastong paghawak at pag-iimbak ng pagkain upang maprotektahan ang kalusugan ng publiko at maiwasan ang mga sakit na dulot ng kontaminadong pagkain.
