Matagumpay na naaresto ng Urbiztondo Municipal Police Station ang isang wanted person sa Bayan ng Bautista, Pangasinan.
Isinagawa ang operasyon sa ilalim ng pamumuno ni PMAJ Fernan L. Rivera, Acting Chief of Police ng Urbiztondo PNP, bilang bahagi ng patuloy na kampanya ng kapulisan laban sa kriminalidad at sa pagtugis sa mga indibidwal na may kinakaharap na kaso sa batas.
Ayon sa ulat ng pulisya, ang pag-aresto ay isinagawa sa bisa ng Warrant of Arrest na inisyu ng Branch 13-Family Court ng Regional Trial Court sa San Carlos City, Pangasinan.
Ang akusado ay nahaharap sa kasong Acts of Lasciviousness sa ilalim ng Article 336 ng Revised Penal Code kaugnay ng Republic Act 7610 o Special Protection of Children Against Abuse, Exploitation and Discrimination Act. Ang inirekomendang piyansa para sa pansamantalang kalayaan ng akusado ay nagkakahalaga ng walumpung libong piso.
Matapos ang pag-aresto, agad na dinala ang suspek sa Custodial Facility ng Urbiztondo Police Station kung saan siya kasalukuyang nakapiit habang isinasagawa ang kaukulang dokumentasyon at inaayos ang mga susunod na legal na hakbang alinsunod sa umiiral na batas.
Samantala, muling tiniyak ng pamunuan ng Urbiztondo PNP ang patuloy na pagpapaigting ng kanilang mga operasyon laban sa kriminalidad, iligal na droga, at sa mas pinaigting na pagtugis sa mga wanted person.
Layunin ng mga hakbang na ito na mapanatili ang kapayapaan, kaayusan, at kaligtasan ng mga mamamayan sa buong nasasakupan ng Urbiztondo.
