Inanunsyo ng U.S. Central Command (CENTCOM) nitong Sabado na nagsagawa sila ng 10 serye ng pag-atake laban sa mahigit 30 target ng grupong Islamic State (ISIS) sa Syria.
Sa ulat ng militar, isinagawa ang mga nasabing operasyon sa pagitan ng Pebrero 3 hanggang Pebrero 12.
Ayon sa CENTCOM, partikular na pinatamaan ng Estados Unidos ang mga imprastraktura at imbakan ng mga armas ng ISIS upang pahinain ang kapasidad ng nasabing teroristang grupo.
Layunin ng mga serye ng pag-atakeng ito na mapanatili ang seguridad sa rehiyon at pigilan ang muling paglakas ng pwersa ng Islamic State.
Binomba ng mga pwersang Amerikano ang mga kritikal na imprastraktura ng ISIS, kabilang ang mga kampo, command centers, at mga pasilidad para sa imbakan ng malalakas na uri ng armas.
Bagama’t hindi tinukoy ang eksaktong mga bayan, ang operasyon ay nakatutok sa mga kilalang kuta ng mga nalalabing pwersa ng Islamic State sa loob ng teritoryo ng Syria.
Ayon sa ulat, walang naiulat na nasugatan o nasawi sa panig ng mga sundalong Amerikano sa kabuuan ng 10-araw na operasyon.
Sa kabila ng pagkatalo ng ISIS sa kanilang “caliphate” noong 2019, nananatili ang banta ng mga “sleeper cells” nito sa Iraq at Syria, na patuloy namang binabantayan ng U.S. at ng kanilang mga kaalyadong pwersa.
