Dagupan City – Patuloy na hinihikayat ni Cadet Major Darren Troy Cayabyab, Acting Executive Officer ng PSU Lingayen ROTC Unit, ang mga kabataan na sumali sa Reserve Officers’ Training Corps (ROTC) program upang magkaroon ng kakayahan na makatulong sa bansa sa panahon ng pangangailangan.
Ang ROTC ay isang programa sa Pilipinas na naglalayong magbigay ng military training sa mga estudyante sa kolehiyo upang ihanda sila sa paglilingkod sa militar o sa iba pang mga serbisyo publiko.
Ayon kay Cad. Maj. Cayabyab, ang ROTC ay isang mahalagang plataporma para sa paghubog ng disiplina, pagmamahal sa bayan, at paghahanda sa serbisyo publiko.
Hindi lamang ito tungkol sa military training kundi tinuturuan din nito ang mga kabataan ng mga kasanayan sa pamumuno, pagtutulungan, at pagiging responsableng mamamayan.
Idinagdag pa niya na ang mga kaalaman at kasanayang natutunan sa ROTC ay makakatulong sa mga kabataan na maging handa sa pagtugon sa mga kalamidad, sakuna, at iba pang emergency situations.
Sa pamamagitan nito, nagkakaroon aniya ng pagkakataon na hubugin ang susunod na henerasyon ng mga lider at tagapaglingkod ng bayan.
Ibinahagi rin ni Cad. Maj. Cayabyab ang kanyang personal na karanasan sa ROTC, kung saan natuto siya sa “military culture” na siyang patuloy na nagbibigay sa kanya ng kaalaman upang hubugin pa ang kanyang mga kakayahan.
Dagdag pa niya, ang pagiging militar ay likas na sa kanyang pamilya at ito ang kanyang pinanghahawakan upang makamit ang kanyang mga layunin.
Samantala, Nanawagan si Cad. Maj. Cayabyab sa mga kabataan na maging bukas sa posibilidad na sumali sa ROTC at tuklasin ang mga benepisyong maaaring idulot nito sa kanilang personal na pag-unlad at sa paglilingkod sa bansa.
