BOMBO DAGUPAN – Intunda na United Nations so paniiter na naakan diad Southern Gaza City ya Rafah kasumpalan ya naupot so suplay tan agga ligtas ya security situation diman makasengeg ed unbabaleg ya military operation na Israel.
Onong ed UN World Food Program, nauputan lay iiter ya naakan para ed saray Palestinong naiipit ed gulo ya wala ed central Gaza no iner nilasus libon totoo so manaayam diman natan.
Nilira ed saya, nanpasakbay so UN ed say unpepeligron ikapoy na humanitarian operations diad abitlan teritoryo.
Ginawa na UN so abitlan pasakbay diad kapegleyan na ikekerew na arrest warrant na top war crimes court ed interon mundo ya target so Israel tan Hamas leaders.
Onong ed UN, walad 1.1 milyon ya totoo diad Gaza, halos kapaldua na populasyon so makakaliknay kakulangan na naakan tan eras.
