Umaasa ang mga tricycle driver na mas bababa pa ang presyo ng gasolina upang hindi lamang mabawasan ang kanilang araw-araw na gastusin sa pamamasada kundi magkaroon din ng pagkakataong mapagaan ang pamasahe para sa mga pasahero.
Ito ay kasunod ng mga naging pagtaas sa presyo ng produktong petrolyo na malaking epekto sa kanilang pang-araw-araw na hanapbuhay. Bagama’t nakatulong ang naging rollback sa presyo ng gasolina, nais pa rin ng mga drayber na mas bumaba ito upang mas maramdaman ang ginhawa sa kanilang gastusin.
Isa na rito si Ronnie Villasor, isang tricycle driver mula sa Bonuan Gueset sa Dagupan City, na nagsabing malaking bagay para sa kanila ang pagbaba ng presyo ng gasolina dahil direktang nakatutulong ito sa kanilang kita.
Ayon kay Villasor, ramdam din nila ang paghina ng kanilang pasada dahil marami sa mga pasahero ang mas pinipiling sumakay ng jeepney na may mas murang pamasahe. Aniya, halos tatlumpung piso ang pamasahe sa tricycle habang nasa labinlimang piso naman ang pamasahe sa jeepney.
Dahil dito, umaasa siyang mas bababa pa ang presyo ng gasolina upang mas maging abot-kaya ang pamasahe sa tricycle at hindi na gaanong mahirapan ang mga pasahero sa pagpili ng kanilang sasakyan.
Ibinahagi rin niya na mas malaki na ngayon ang kanilang nagagastos sa gasolina sa isang araw kumpara noon. Mula sa dating isang daan hanggang isang daan at limampung piso, umaabot na umano sa dalawa hanggang tatlong daang piso ang kanilang nagagastos sa maghapong pamamasada.
Para sa mga drayber, malaking tulong ang bawat pisong maibabawas sa presyo ng gasolina dahil maaari itong maidagdag sa kanilang maiuuwi sa pamilya.
Umaasa ang mga tricycle driver na mas bababa pa ang presyo ng gasolina upang mabawasan ang kanilang puhunan sa bawat biyahe at magkaroon din ng pagkakataong maging mas abot-kaya ang pamasahe para sa mga pasahero.
Gayunman, ang anumang pagbabago sa pamasahe ay kailangang dumaan sa kaukulang proseso at pagsasaalang-alang sa umiiral na fare rates.
