DAGUPAN CITY– Inatey so sakey ya tricycle driver nen saya so pinaltog na aga kabat ya suspek diad Purok 5 Lucao district diad ciudad na Dagupan.
Kinabat so biktima ya si Cyrill Decano, 34-anyos, residente na Purok 2 diad abitlan lugar.
Diad inisyal ya imbestigasyon na saray otoridad, antes ya agawa so insidente aki inuman ni biktima diad mismon birthday na kaaro ton si Myla Palma, 28 anyos kaiba ira di Jose decano, 34 anyos, Mayet Pascua, tan sakey ya kinabat ed ngaran labat ya Gerald ,residente na Brgy Banaoang, Calasiao.
Legan na inuman so nanpatanir so biktima ya manirit diad beneg na abong nen biglan pinmarungtal so sakey ya agga labat ya laki ya walay emben ton paltog tan inasinggeran so biktima tan saya so pinaltog.
Tampol ya inreport ed saray pulis so agawa bangbalet akatakas so agga kabat ya suspek.
Imbaga daray akanengneng ya say suspek so walay katagey ya 5’2, kayumanggi so baog to, mabeng, akasulong na duyaw ya kawes tan andeket ya stripes ya shorts tan akatsinelas.
Kaleganan tonya, arekober diad akagawaan na insidente so taloran slugs na caliber 45.
Tuloy ni gagawen ya imbestigasyon ed abitlan insidente.
