Ipatutupad na ngayong huling linggo ng Hunyo ang taas-singil sa tubig ng Mangaldan Water District sa bayan.
Batay sa anunsyo ng water district, layon ng dagdag-singil na mapanatili ang maayos na serbisyo, at matustusan ang operational expenses ng ahensya.
Sakop ng adjustment ang lahat ng customer sa ilalim ng kanilang serbisyo.
Sa bagong rate adjustment, inaasahang tataas ang bayarin depende sa konsumo ng bawat household.
Mas magiging kapansin-pansin ang dagdag sa singil para sa mga may mas mataas na water consumption.
Nilinaw ng pamunuan ng water district na bahagi ito ng naaprubahang rate rebasing at dumaan naman sa tamang proseso, kabilang ang konsultasyon sa publiko at pag-apruba mula sa regulatory body.
Samantala, umaasa ang mga residente na sasabayan ng pagtaas sa singil ang mas maayos na suplay ng tubig, lalo na sa mga lugar na nakakaranas ng madalas na pagkaantala sa serbisyo.
Patuloy naman ang panawagan ng ilang mamamayan para sa transparency at regular na update sa mga pagbabago sa singil, gayundin sa mga proyekto ng water district.
Sa kabila ng pagtaas ng bayarin, tiniyak ng pamunuan na ginagawan na nila ng paraan upang mas mapaigi ang distribusyon ng malinis na tubig sa bayan ng Mangaldan.
