DAGUPAN CITY- Impasiguro na National Food Authority o NFA Western Pangasinan ya mansasansian susto so supply na belas da.
Onong ed kinen Chona Maramba, assistant provincial manager na NFA Western Pangasinan, unsabi la so inimport ya belas na NFA tan saya so susto diad panaon na lean months.
Impalapag nen Maramba ya tuloy tuloy ni so panlalako da na belas diad saray accredited retailers ed kantidad ya P27 kada kilo.
Posiblen angga ed bolan na Agosto so panlako da na belas tan kayari tonya so untutok la so NFA ed pansaliw na ilik diad saray dumaralos.
Kaleganan tonya, nilinew nen Maramba ya likod ed saray accredited rice retailers iitdan da met na rice allocation so Bureau of Jail Management and Penology o BJMP.
Bangbalet, no wala ray kalamidad labat la so paniiter da na alokasyon diad saray Local Governent Unit.
