DAGUPAN CITY– Intulor la niman ya kabuasan so retiradon sundalo na Philippine Army ya dinukot tan pinutotan na ulo na saray Abu Sayyaf Group (ASG) diad Basilan nen kapigan labat.
Insempet tan nilamayan si retired Master Sgt. Julio Pasaoa diad abong na unaan tonyan asawa diad barangay Bari, Mangaldan,Pangasinan.
Bandad ala-8 na kabuasan, intulor iya diad Mangaldan Public Cemetery. Initdan iya na 21 gun salute bilang pamirbir ed say inpanserbisyo to.
Kaleganan tonya, akiambegya met so pigara ran sundalo na nanlapu nid Camp Tito Abat.
No nanonotan, dinukot na Abu Sayyaf si Pasaoa nen linmusob iray bandido diad Barangay Upper Mahayahay ed Maluso, Basilan nen Agosto 21, tan kayari pinoolan so abong na datin sundalo. Martes la na palbangon anengneng so pinugutan ya sundalo.
Akabatan ya nanpa-convert diad Islam si Pasaoa tan mas pinili ton manayam diad Basilan kaibay kumaduwa ton asawa ya taga Basilan.
