DAGUPAN CITY—Ibinahagi ni Priscilla Rollo Wijesooriya, Bombo International News Correspondent, ang kalagayan sa Sri Lanka habang papalapit ang Semana Santa—isang paggunita na nananatiling mataimtim at puno ng tradisyon para sa mga Katoliko sa bansa.
Ayon sa kanya, abala na ang mga deboto sa paghahanda ng mga gawaing panrelihiyon, partikular sa mga lugar tulad ng Colombo at Negombo kung saan malaki ang populasyon ng mga Kristiyano. Isinasagawa ang mga tradisyunal na aktibidad gaya ng mga prusisyon sa lansangan at ang pagsasabuhay ng paghihirap ni Kristo. Karaniwan ding nagtatayo ng mga altar sa kanilang mga tahanan, tanda ng malalim na pananampalataya na taun-taong ipinagdiriwang.
Sa pagdating naman ng Pasko ng Pagkabuhay, kapansin-pansin ang masayang pagbabahaginan sa komunidad—pagkain, kasuotan, at tawanan—na sumisimbolo sa muling pagkabuhay ni Hesus.
Sa kabila ng ganitong selebrasyon, hindi rin nakaliligtas ang Sri Lanka sa epekto ng tensyon sa Middle East, lalo na sa usapin ng suplay ng langis. Ibinunyag ni Wijesooriya na nakapag-secure ang kanilang pangulo ng kabuuang 38,000 metric tons ng fuel mula India upang matugunan ang pangangailangan ng bansa.
Bagama’t may bahagyang pagtaas sa pasahe, iginiit niyang hindi pa ito umaabot sa puntong mabigat para sa mamamayan. Gayunpaman, nagpapatupad ang kanilang pamahalaan ng mga hakbang upang makatipid sa konsumo ng gasolina—kabilang ang “no-class Wednesday” sa mga paaralan at maging sa ilang pribado at pampublikong bangko.
Mahigpit din umano ang pagpapatupad ng regulasyon sa presyo ng mga bilihin. Sa ngayon, wala pang malawakang pagtaas sa merkado maliban sa fuel at pasahe.
Sa kabuuan, ipinapakita ng Sri Lanka ang pagsusumikap na mapanatili ang balanse, ang pagdiriwang ng pananampalataya sa gitna ng krisis, at ang maagap na pagtugon ng pamahalaan upang hindi lubusang maramdaman ng mamamayan ang epekto ng pandaigdigang tensyon.
