DAGUPAN CITY – Anggaman ya bibirbiren ya pangekal na pakakaugip ed saray mantatrabaho na labi, nanpasakbay so pigaran eksperto ya say sobran paninom na energy drinks so makapoy ed laman.
Diad impituyaw na Bombo Radyo Dagupan ed kinen Mr. Kendall Gatan, nutrition officer 3 na Nutrition Council-Region1, impalapag ton agga aaboloyan so siopaman ya basta labat uninom antokaman ya agew ya labayen tonya.
Inkuwanto ya say energy drinks so klase na iinumen ya makapan-arum na kasil na laman tan makatulong ya papelesen so walan nononoten.
Anggaman sayan inumen so mangiiter na abitlan temporaryon epekto, walaray managsokisok so mangibabagan say sobran konsumo tonya so nayarin makapangiter na makapoy ya epekto diad laman.
Kanyan say ipapayo da so mas marakep no manpakonsulta nid say eksperto ya singa saray nutritionist o doktor antes ya magmaliw ya “habit” na siopaman so paninom diad saya.
