Kinumpirma ng Office of the Ombudsman ang rekomendasyon ng Department of Justice (DOJ) na sampahan ng plunder case si Senator Jinggoy Estrada at iba pang opisyal, kaugnay ng umano’y anomalya sa kontrobersyal na flood control projects.
Ayon kay Assistant Ombudsman Mico Clavano, kabilang si Estrada sa mga “primary respondents” na nakasaad sa resolusyon ng DOJ.
“The primary respondents named in the resolution of the DOJ include Senator Jose ‘Jinggoy’ Ejercito Estrada,” ani Clavano sa press conference kahapon, Mayo 18, 2026.
Kasama rin sa listahan ng DOJ si dating Department of Public Works and Highways Secretary Manny Bonoan.
Tumanggi namang magkomento si Estrada tungkol sa plunder case. “No comment,” ani Estrada, at idinagdag pa niya, “Talk to my lawyer.”
Matatandaang bukod kay Estrada, nauna na ring inihayag ng Ombudsman ang kasong inihahanda laban kay Sen. Chiz Escudero at dating House Speaker at Leyte 1st District Rep. Martin Romualdez.
Sa mga kasalukuyan at dating senador, si dating Sen. Bong Revilla lamang ang naaresto kaugnay ng umano’y anomalya sa flood control projects.
