DAGUPAN CITY – Sobran liket na 15-anyos ya atleta manlapud baley na Anda, Pangasinan kasumpalan ya naala tonya diad sangkaunan ya pankanawnawa so gold medal diad athletics- high jump secondary boys ed gagaween ya 2018 Palarong Pambansa.
Diad ekslusibon impituyaw na Bombo Radyo Dagupan ed kinen Brian Celeste, gold medalist diad High Jump Secondary (boys), imbaga toyan agto inilaluan ya sikato so makala na gold medal.
Inkuwanton, seet tan panpursigi so ginawa to piyan mantalonggaring.
Dineral nen Celeste so record ya nikurit sanen 2015 Palarong Pambansa.
Akapangikurit si Celeste na 1.99 meter-record tan dineral to so record nen Alexis Soqueno mula Region 6 nen 2015 ya 1.95 meters .
Kaleganan tonya, impalapag toyan maong met ya mangalaw iray kakaiba ton atleta ya misasali diad abitlan event kanyan aga arawin makala ira na gold medal no sikara labat so manpursigi tan mandasal.
