DAGUPAN CITY-Inatey so sanasawa diad karambola na taloran luluganan diad San Fabian, Pangasinan.
Kinabat iray biktima ya sikara di Eduardo Pedeglorio 55 anyos tan misis ton si Cecilia, 51 anyos.
Onong ed impormasyon, akalugan so sanasawa diad motorsiklo diad karukuyan na Brgy Tempra Guilig San Fabian nen binmangga ira diad sakey ya tricycle ya imamaneho nen Jerry Juguilon ya mangala komon na pasahero diad gilig na kalsada.
--Ads--
Lapud saya, binmantak so sanasawa tan abangga na sakey ya pampasaherong bus ya imamaneho nen Benhur Domingo.
Tampol ya inatey so asawan laki legan ya naawit met ni diad ospital so asawan bii balet inatey lam lamang.
Patuloy so imbestigasyon na kapulisan ed asalitan insedente.
