DAGUPAN CITY– Inatey so sakey ya padre de pamilya, say anak ton laki legan ya asugatan so sakey nin anak to kasumpalan ya pinapaltog diad baley na Aguilar Pangasinan.
Kinabat iray inatey ya biktima ya sikara di Wilfredo De vera, 56 anyos tan anak to ya si Kid Willy, 30 anyos kasumpalan ya aminpigan pinaltog na saray kakanayon da lamlamang diad loob na abong da diad Brgy Panacol ed abitlan baley.
Kinabat so asugatan ya anak to ya si Kathlyn, 27 anyos ya manpapaabig la natan diad patambalan.
Kinabat balet iray suspek ya sikara di Julian de Vera, 63, anak ton si Jefferson de Vera, 39, tan saray kakaanakan ton sikara di Marvin de Vera, 46; Ariel Zuñiga, 27; tan sakey ya menor de edad ya ag metla nginaranan tan sikara so wala la ed kustodiya na saray pupulis.
Antes ya agawa so insedente so awalaan la na kolkolan na pamilya daray biktima tan suspek.
Arekober diad akagawaan na insedente so duwaran basyo na 12-gauge shotgun, 2 basyo manlapud calibre 45 pistol, tan sakey ya kutsilyo.
Arumog met diad abong nen Julian De Vera so sakey ya calibre 45 paltog.
Tuloy so paniimbestiga na pupulis ed say agawan insedente.
