DAGUPAN CITY– Akaarap ed pigaran kaso so sakey ya 58 anyos na laki kasumpalan ya pasakbayan ya pateyen so mayor na Bolinao, Pangasinan.
Diad impituyaw na Bombo Radyo Dagupan ed kinen Police Chief Inspector Joseph Mark Sibayan, hepe na Bolinao PNP, inkuwanton personal ya linmad istasyon da si Bolinao Municipal Councilor George Celeste piyan ireport tan ipaanta so ginawan panpasakbay tan pangugulo diad abong da na sakey ya Domingo Celi, 58 anyos, walay asawa tan residente ed abitlan lugar.
Onong ed kinen Councilor Celeste , linmad compound da si Celi ya anggapoy patanir tan diman nanggulo.
Babanuen eya na saray pigaran membro na pamilya Celeste bangbalet agga pabano tan inloor toni nan eskandalo .
Lapud saya, mismon say mayor la na abitlan baley ya si Bolinao Mayor Arnold Celeste so linman manbabano ed biktima bangbalet imbes ya untunda so inloor to ni nan gulo.
Intulak to so mayor tan impawayan to na sakey ya bladed weapon. Iniyagan tan pinasakbayan to si Mayor Celeste ya saya so pateyen tonya.
Akabatan ya akainom so suspek nen agawa so asalitan insidente tan makakaranas na graben depresyon diad bilay.
Anggaman asingger dan kanayon , disidido so pamilya Celeste ya isegepan na pigaran kaso so abitlan suspek.
