DAGUPAN CITY– Akaarap ed pigaran kaso so sakey ya laki tan say live in partner tonya ya sakey ya half Filipina tan half Syrian national lapud inpanabuso tan inpankidnap ed say datin kaamong na suspek diad baley na Mapandan, Pangasinan.
Diad ekslusibon impituyaw na Bombo Radyo Dagupan ed kinen PSI Bernard Antolin hepe na Mapandan PNP narel day live in partner to diad tulong na CIDG, PNP Station na Manaoag, Villasis tan Sta Barbara .
Say suspek ya si Dennis Balolong so walay kakaarapen ton 5 counts of rape , kidnapping tan serious illegal detention no iner say biktima tonya so dati ton inyamong ya agga metla ngiranan.
Alanor met so live in partner ton si Rasha Al Bote lapud partisipasyon tonya ed abitlan insedente.
Onong ed say akusasyon na biktima , inimbitaan iya na dati ton live in partner tan inawit diad sakey ya hotel no iner nansusublayan ya inabuso na suspek kaiba so agi tonya.
Bangbalet onong ed suspek, frame up labat so insedente tan imburi to so ipapalsa ed sikara na say dati ton inyamong.
Immuna lan naaresto so agi na suspek ya akakulong met la natan.
