DAGUPAN CITY-Inatey so 52 anyos ya bii kasumpalan ya nalner ed saket timban danum diad baley na Lingayen, Pangasinan.
Kinabat so biktima ya si Merly Velasco, 52 anyos, anggapoy asawa tan residente na brgy. Tonton diad abitlan baley.
Onong ed imbestigasyon na saray otoridad, linma so biktima diad banyo piyan manames komon bangbalet saya akurinyas ya sengegan na impakatumba to.
Nibana met ya nilebleb so ulo na biktima diad santimban danum tan nairapan yan makaalagey ya sengegan na aga makaingas diad impakalebleb to ed danum.
Adiskubre labat so insidente kasumpalan ya linma so agi to ya kinabat ya si Bernadine Velasco piyan mangiter komon na naakan na ina dan mansasakit.
Imbatik iya diad ospital bangbalet indeklara iyan dead on arrival na saray doktor.
Akabatan ya say biktima so walay diprensya ed isip.
