DAGUPAN CITY- Inpasilong la ed State of Calamity so baley na Bayambang, Pangasinan lapud inpanderal na harabas o army worms ed saray tanem ya sibuyas.
Diad ekslusibon impituyaw na Bombo Radyo Dagupan ed kinen Artemio Buezon Municipal Agriculture Officer na Bayambang, inkuwanton unaabot ed masolok walonlasus ya ektarya na taneman na sibuyas so inatake na abitlan bigis.
Saya so kabaliksan na masolok ya limaran million pesos ya kantidad ya nepeg ya naalmoan na saray dumaralos.
Impaliwawa ni nen Buezon, ya unaabot ed apataplo iran barangay so naapektuan na army worms o harabas kanyan nandisisyon la so baley dan ipasilong ed state of calamity.
Inyarum tonin maples so indakel na saray harabas diad taneman na sibuyas kanyan ngalngalin anggapo la so napinabangan na saray dumaralos diad tanem da.
Koneksyon tonya, salien dan mitongtong ed lokal ya gobyerno ya usaren so calamity fund ya parad saray dumaralos ya naapektuan na harabas o army worms.
